Peirianneg a Modurol

Peirianneg sy’n gyrru popeth o’n cwmpas. Mae peirianwyr electronig wedi cynorthwyo i greu eich ffôn clyfar. Mae peirianwyr cemegol wedi profi eich colur. A bydd peirianwyr cerbydau modur wedi gweithio ar eich car.

‘Gwneud i bethau ddigwydd’ y mae peirianwyr; mae’n berthnasol i bopeth! Dewch draw i’n noson wybodaeth ym mis Mawrth a gallwch wneud yn union hynny!

Mae gweithwyr peirianneg yn cynnwys gweithredwyr peiriannau sy’n gwneud gwaith cydosod, crefftwyr sy’n gwneud gwaith cynnal a chadw, saernïo, weldio a pheiriannu, a thechnegwyr peirianneg sy’n gweithio ar ddatrys problemau ymarferol. Mae’n cynnwys hefyd drydanwyr a thechnegwyr cynnal a chadw trydan sy’n gweithio ym meysydd electroneg ddomestig a diwydiannol. Ceir manylion am gyrsiau gwaith gosod trydanol domestig ar ein tudalennau Adeiladu.

Mae gan y maes peirianneg ddyfodol llewyrchus ac mae’n cynnig cyfleoedd rhagorol o ran hyfforddi a swyddi posibl mewn ystod eang o feysydd. Mae datblygiad gyrfaol ar bob lefel yn cynnig cyfleoedd i symud yn eich blaen at swyddi goruchwyliol, fel technegwyr peirianneg i gychwyn ac yna swyddi uwch fel peirianwyr corfforedig neu siartredig.

• Technoleg Fodurol
• Peirianwyr Dylunio
• Gwneuthurwyr
• Rheolwyr
• Peirianwyr Systemau Pŵer Trydanol
• Peirianwyr Cynhyrchu
• Gwaith Atgyweirio Cyrff Cerbydau
• Weldwyr
• Arolygwyr weldio
• Adeiladwyr llongau
• Peirianwyr Chwaraeon Modur
• Peirianwyr Saernïo a Weldio

Mae hon yn un o’r ychydig grefftau lle y ceir her gyson i ddatblygu sgiliau newydd ar gyfer gwahanol sefyllfaoedd. Mae weldio yn faes eang – ceir cyfle wastad i ddysgu mwy am y prosesau a’r technegau lu. Ceir llawer o gyfleoedd am swyddi yn y DU a thramor gan fod y sgiliau a’r cymwysterau a enillir yn y wlad hon yn ddilys ledled y byd.

Mae peirianneg fecanyddol yn cynnwys llawer o agweddau, er enghraifft, dadansoddi, dylunio a chynnal a chadw systemau mecanyddol. Byddwch yn datblygu dealltwriaeth gadarn o’r prif gysyniadau. Mae peirianwyr mecanyddol yn defnyddio’r egwyddorion hyn ac eraill wrth ddylunio a dadansoddi pethau fel peiriannau, awyrennau, cerbydau modur, teclynnau meddygol a llawer mwy.

Mae’r swyddi fel arfer mewn garejys, cwmnïau trafnidiaeth a chludiant neu sefydliadau mawr sydd â fflydoedd o gerbydau. Fel technegydd byddwch yn gwneud gwaith diagnostig, yn cynnwys gwaith ar systemau trydanol a systemau a reolir gan gyfrifiaduron. Mae’r gwaith yn heriol ac yn rhesymegol, yn cynnwys llawer o waith datrys problemau. Mewn cwmnïau mawr, mae fel arfer yn bosibl cael dyrchafiad i swyddi goruchwylio a rheoli.

Mae’r sgiliau ar gyfer atgyweirio ac ailorffen cyrff cerbydau’n amrywio o waith ar baneli i lanhau, weldio MIG a chywiro diffygion paent. Mae’r swyddi fel arfer mewn garejys, siopau cyrff ceir a’r diwydiant chwaraeon modur sy’n arbenigo mewn atgyweirio cerbydau ar ôl damweiniau.

Mae cyrsiau llawn amser yn cynnig y cam cyntaf tuag at gymhwyster fel trydanwr ac yn canolbwyntio ar ddiwydiant. Mae’r cyrsiau’n cynnwys astudio ar gyfer cymwysterau technegol City and Guilds. Bydd yr wybodaeth sylfaenol a geir o astudio’r cwrs yn eich galluogi i symud yn eich blaen i wasanaethau eraill sy’n gysylltiedig â gwasanaethau trydanol/electronig. Mae angen i drydanwyr fod yn ffit, gallu gweld lliwiau, gallu gweithio ar uchder a bod yn barod i deithio. Mae’n swydd i bobl a chanddynt feddwl doeth, lle y bydd angen ichi ystyried eich diogelwch eich hun a diogelwch eraill, a sylwi ar bob manylyn.

Mae’r Rhaglen Llwybr at Brentisiaeth yn llwybr hyblyg sy’n darparu’r wybodaeth a’r sgiliau sylfaenol y mae eu hangen mewn diwydiant. Bydd dysgwyr yn treulio hyd at flwyddyn ar raglen hyfforddi ddwys lawn amser sy’n cynnwys profiad gwaith ymarferol a chymhwyster galwedigaethol Lefel 2, yn ogystal â’r sgiliau a’r wybodaeth y mae arnoch eu hangen i fynd yn eich blaen at Brentisiaeth lawn amser.

Mae Coleg Gwent yn cynnig amrywiaeth o gyrsiau, yn cynnwys rhaglenni Cyn-Brentisiaeth, yn symud ymlaen at hyfforddiant pellach hyd at lefel prifysgol a thu hwnt. Pa un a ydych am astudio’n llawn amser, yn rhan amser neu ar ddyddiau wedi eu rhyddhau o’r gwaith, mae gennym gwrs ar eich cyfer chi.