Datblygiadau Ystadau

Mae Parth Dysgu Torfaen yn rhan o raglen Ysgolion a Cholegau’r 21ain Ganrif, Llywodraeth Cymru. Mae’r datblygiad £24 miliwn, sy’n cael ei reoli a’i redeg gan Goleg Gwent mewn partneriaeth â Chyngor Bwrdeistref Sirol Torfaen, yn disodli tri chweched dosbarth mewn ysgolion cyfrwng Saesneg yn y fwrdeistref ac yno y bydd holl addysg Lefel A Torfaen yn cael ei ddarparu.

Daw’r campws newydd â gwasanaethau addysg bellach ynghyd o dan yr un to i Dorfaen. Cynigir ystod eang o gyrsiau gan gynnwys cymwysterau academaidd, galwedigaethol a chymwysterau lefel prifysgol. Cynigir cyrsiau sy’n addas i bobl o bob oedran a phob math o ddysgwyr, gan gynnwys Bagloriaeth Cymru. Dilynir model tebyg i Barth Dysgu Blaenau Gwent yng Nglynebwy ac mae’r adeilad yn gwbl hygyrch ac yn cynnwys adnoddau arbenigol ar gyfer disgyblion ag Anghenion Dysgu Ychwanegol (ADY).

Mae naws y campws yn iach ac ysgafn ac mae yno gyfleusterau a mwynderau modern – amgylchedd delfrydol ar gyfer dysgu ac ysbrydoli meddyliau ifanc. Ystyriwyd effaith amgylcheddol y Parth Dysgu wrth ei gynllunio, ac mae mewn lleoliad gwych y drws nesaf i siop Morrisons yng nghanol y dref. Golyga hyn ei bod yn hawdd i ddysgwyr a staff gyrraedd iddo a manteisio ar y cysylltiadau rhagorol â thrafnidiaeth gyhoeddus a chyfleusterau lleol.

Gyda’r angen cynyddol am wybodaeth a sgiliau STEM yn yr economi leol, uchelgais Coleg Gwent yw addysgu gweithlu’r dyfodol mewn adeilad pwrpasol lle bydd myfyrwyr yn cael eu hamgylchynu gan arloesedd a thechnoleg sy’n adlewyrchiad o’r diwydiant. Bydd ein Canolfan Beirianneg Gwerth Uchel (HiVE) newydd yng Nglynebwy yn agor ar hen safle ffatri Monwel yn 2023.

Mewn partneriaeth â Chyngor Bwrdeistref Sirol Blaenau Gwent, Llywodraeth Cymru, y Cymoedd Technoleg, ac addysg, rydym ar fwriad buddsoddi £8.5 miliwn mewn Canolfan Beirianneg Uwch yn agos at gampws Parth Dysgu Blaenau Gwent, a fydd yn cynnig addysg peirianneg o ansawdd uchel er mwyn rhoi’r sgiliau angenrheidiol i bobl ifanc ar gyfer y dyfodol.

Mae’r prosiect yn y cyfnod cynllunio ar hyn o bryd, a bwriedir dechrau adeiladu’r ganolfan ragoriaeth yn ystod haf 2022. Rydym yn bwriadu creu cyfleuster addysg o’r radd flaenaf, sy’n garbon niwtral ac yn hollol ddigidol. Byddwn yn hyfforddi gweithlu’r dyfodol mewn disgyblaethau peirianneg uwch megis roboteg, deallusrwydd artiffisial, seiberddiogelwch, gweithgynhyrchu awtonomaidd, efelychiad a realiti estynedig. Bydd y cwricwlwm yn cael ei gynllunio a’i arwain gan arbenigwyr yn y diwydiant. Cyflwynir cyrsiau newydd ar lefelau 3, 4, 5 a 6, gan ddod â rhagoriaeth ac arbenigedd i’r ardal a rhoi hwb i’r economi leol.

Bydd Canolfan HiVE, drwy ddod â diwydiant ac addysg at ei gilydd i faes peirianneg gwerth uchel, yn cynnig cyfleoedd ymchwil a datblygu i bartneriaid yn y diwydiant. Bydd yn ganolfan ar gyfer rhaglenni allgymorth ysgolion a chyflogwyr, a fydd o fudd i’r gymuned ehangach.

Mae Campws Dinas Casnewydd, sydd wedi’i leoli ar heol Nash, angen buddsoddiad sylweddol er mwyn addysgu gweithlu’r dyfodol i’r safon uchaf a darparu cyfleusterau addysgu a dysgu rhagorol. Mae Cyngor Bwrdeistref Sirol Casnewydd wedi cyhoeddi cynnig adfywio i symud Canolfan Casnewydd i safle canolfan hamdden newydd ar Lan yr Afon, gyda safle presennol Canolfan Casnewydd yn cael ei ddatblygu’n gampws newydd i Goleg Gwent ac yn rhan o Ardal Wybodaeth Casnewydd.

Mae hyn yn rhoi cyfle i ni greu cyfleuster newydd sbon, modern ac addas i’r diben mewn lleoliad sy’n haws i’n dysgwyr a’n staff gyrraedd iddo. Bydd y campws modern gwerth £90m yn symud darpariaeth ystod eang o gyrsiau addysg bellach o Heol Nash, gan ddod â thua 2,000 o fyfyrwyr a staff i ganol y ddinas. Bydd yr amgylchedd dysgu gwell hwn yn agos at gampws Prifysgol De Cymru – darpariaeth addysg uwch bresennol y ddinas – ac yn ffurfio Ardal Wybodaeth Casnewydd.

Bydd y cyfleuster addysg newydd sbon yng nghanol y ddinas yn cynnig cyfleoedd dysgu mwy hygyrch er mwyn gwella canlyniadau addysgol ac adnoddau cymunedol yr ardal ac, ar yr un pryd, yn rhoi hwb i’r economi leol a chynyddu nifer yr ymwelwyr yng nghanol y ddinas.