Adegau balch a dyfodol disglair i Ddosbarth 2025 Coleg Gwent

Cyflawnodd 98.2% o fyfyrwyr y coleg graddau Safon Uwch A*-E

Mae myfyrwyr yn Coleg Gwent – un o golegau addysg bellach mwyaf Cymru – yn casglu canlyniadau BTEC, UG a Safon Uwch yng nghampysau’r coleg heddiw (14 Awst).

Cyflawnodd 98.2% o fyfyrwyr y coleg graddau Safon Uwch A*-E, wrth i 87% o fyfyrwyr BTEC gyflawni gradd pasio neu uwch ar draws 56 o wahanol feysydd pwnc galwedigaethol.

Bydd y canlyniadau rhagorol hyn yn galluogi dysgwyr i gymryd eu camau cyntaf tuag at ddyfodol disglair, gyda llawer o fyfyrwyr yn sicrhau lleoedd mewn prifysgolion, prentisiaethau, a swyddi ledled Cymru a thu hwnt.

Yn eu plith mae

Yn eu plith y mae Carys Morgan, mae ei graddau rhagorol (A*AAA) mewn Celf, Cemeg, Mathemateg, Ffiseg wedi ennill lle iddi astudio Pensaernïaeth ym Mhrifysgol Caerfaddon.

Dywedodd Carys “Rwyf wrth fy modd yn dysgu, ac felly roedd gallu astudio pedwar cymhwyster Safon Uwch yng Ngholeg Gwent yn wych. Mae hefyd wedi bod yn gyfle gwych i wneud ffrindiau newydd, gan nad oedd gennyf lawer cyn dod i’r coleg, ond bellach mae gennyf lwyth!

“Rwy’n drist fy mod yn gadael fy nhiwtoriaid oherwydd rwy’n teimlo fy mod wedi dod i’w hadnabod dros y ddwy flynedd ddiwethaf, ond rwy’n edrych ymlaen at fy nghamau nesaf.”

Rhagorodd dysgwr arall, Miar Williams o Crosskeys, yn ei chwrs Iechyd a Gofal Cymdeithasol, a hynny oll wrth gydbwyso ei chyfrifoldebau fel gofalwr ifanc i’w mam a swydd rhan amser yn gweithio gyda phlant anabl, gan gyflawni AAB.

Dywedodd Miar: “Roedd fy nhiwtoriaid yn wych pan gafodd fy mam ddiagnosis o ganser – fe ddarparon nhw gymaint o gymorth imi ac roeddent wir yn deall yr hyn roeddwn yn ei brofi. Yn ystod fy nghyfnod yn Coleg Gwent, rwyf wedi datblygu sgiliau meddwl yn feirniadol, y gallu i weithio’n effeithiol fel tîm ac wedi magu rhagor o hyder ynof fy hun. Fy mwriad yw mynd i Brifysgol De Cymru i astudio i ddod yn Ymarferydd yr Adran Lawdriniaeth.”

Mae dysgwr arall, Ellis wedi llwyddo i gael  4 A* mewn Mathemateg, Mathemateg Bellach, Ffiseg a Chyfrifiadureg. Gyda chynlluniau i astudio ym Mhrifysgol Caerfaddon, mae Ellis wedi mynd yr ail filltir wrth sefydlu gyrfa fel Peiriannydd Electronig yn y dyfodol.

Yn ychwanegol at lwyddiannau BTEC a Safon Uwch, llwyddodd dros 91 o oedolion sy’n ddysgwyr i gwblhau eu cyrsiau Mynediad at Addysg Uwch gyda Coleg Gwent a byddant yn symud ymlaen i ddilyn cwrs gradd mewn prifysgol.

Yn rhagorol, cyflawnodd 12 o’r dysgwyr hyn ganlyniadau cyfwerth â thair A* mewn Safon Uwch ac maent bellach ar eu ffordd i rai o gyrsiau prifysgol mwyaf clodfawr y DU.

Morgan Hoad, 23, o Flaengarw, a astudiodd y cwrs Mynediad at AU: Cwrs Meddygaeth yng Nghampws Crosskeys. Mae ar fin dechrau astudio meddygaeth y mis Medi hwn.

Dywedodd Morgan: “Mae bod yn feddyg yn rhywbeth rwyf wedi bod eisiau ei wneud erioed, ond nad oedd gennyf yr adnoddau na’r wybodaeth i’w ddilyn. Ni wnaeth y tiwtoriaid yma roi’r gorau o gwbl – roeddent wir yn credu ynof. Rwyf wedi ennill cadernid, dewrder a dealltwriaeth gadarn o wyddoniaeth, yn barod i gymryd y cam nesaf i feddygaeth. Os na wnaethoch gyflawni’r graddau neu heb astudio’r tri phwnc gwyddoniaeth, mae’r cwrs hwn yn garreg gamu wych.”

Dywedodd Nicola Gamlin, Pennaeth Coleg Gwent: “Mae’r cyflawniadau ardderchog a ddathlwn heddiw yn adlewyrchiad gwirioneddol o waith caled a galluoedd rhagorol ein dysgwyr, ochr yn ochr ag arbenigedd ein staff cymorth ac addysgu.

Rydym yn falch ein bod wedi chwarae rhan yn eu taith ac edrychwn ymlaen at weld cyn-fyfyrwyr Coleg Gwent yn mynd yn eu blaenau i gyflawni llwyddiannau pellach fyth. Llongyfarchiadau i’n holl ddysgwyr ar eu cyflawniadau rhagorol.”

Mae Coleg Gwent yn derbyn ymrestriadau ar rai cyrsiau ar gyfer mis Medi o hyd. I ddysgu rhagor, ewch i: https://www.coleggwent.ac.uk/cy/not-too-late