Beth Nesaf? Cyngor i Ddysgwyr Ôl-16

Cwestiynau Cyffredin ar gyfer Ymadawyr Ysgol

Gall gadael yr ysgol a phenderfynu’r hyn yr hoffech chi ei wneud nesaf fod yn eithaf llethol. Mae cynifer o opsiynau ar gael felly mae’n bwysig gwneud yn siŵr eich bod chi’n meddu ar wybodaeth lawn er mwyn gwneud y dewis gorau ar gyfer eich dyfodol.

Rydyn ni yma i ateb rhai o’r cwestiynau mwyaf cyffredin efallai sydd gennych chi am eich camau nesaf, o ddewis y pynciau cywir i ddeall sut i gyflwyno cais a pha gymorth sydd ar gael i chi. Bydd y canllaw defnyddiol hwn yn eich helpu chi i benderfynu beth sydd orau ar eich cyfer chi.

Beth yw’r gwahaniaeth rhwng cyrsiau Safon Uwch a chyrsiau BTEC?

Mae cyrsiau Safon Uwch a chyrsiau BTEC yn ddewisiadau poblogaidd ar ôl arholiadau TGAU gan fod yn addas i arddulliau dysgu gwahanol a nodau gyrfa gwahanol. Dyma’r prif wahaniaethau:

Safon Uwch

• Mae cyrsiau Safon Uwch yn gyffredinol yn fwy academaidd, gan ymdrin â phynciau megis mathemateg, y gwyddorau, y dyniaethau ac ieithoedd.
• Fel arfer, rydych chi’n sefyll arholiadau ar ddiwedd y cwrs sy’n para am ddwy flynedd.
• Yn draddodiadol, cânt eu hystyried fel y llwybr safonol ar gyfer dysgwyr sy’n dymuno mynd i’r brifysgol.
• Cymysgu a pharu rhwng 2 a 3 phwnc Safon Uwch.

BTEC

• Mae cyrsiau BTEC yn ymwneud â dysgu trwy wneud mewn pynciau megis busnes, iechyd a gofal cymdeithasol, gwyddoniaeth a chwaraeon.
• Byddwch chi’n cyflawni gwaith cwrs, prosiectau ac, weithiau, arholiadau.
• Cael y sgiliau a’r wybodaeth angenrheidiol ar gyfer gyrfa benodol.
• Mae cyrsiau BTEC ar gael ar lefelau gwahanol, gan gynnwys Lefel 3, sy’n gyfwerth â chyrsiau Safon Uwch.
• Gall y ddau gymhwyster eich helpu chi i ennill lle yn y brifysgol neu ennill swydd, yn amodol ar eich nodau gyrfa a sut rydych chi’n hoffi dysgu. Edrychwch ar ein canllaw ‘Beth nesaf’ i gael mwy o wybodaeth am eich opsiynau ar ôl gadael yr ysgol.

Oes angen dewis cymhwyster TGAU sy’n cyfateb i’r pwnc rwy’n dymuno ei astudio yn y coleg?

Nac oes, ddim o reidrwydd! Rydych chi’n llawer mwy tebygol o wneud yn dda os ydych chi’n dewis pynciau rydych chi’n eu mwynhau. Dyma awgrymiadau defnyddiol wrth ddewis eich pynciau TGAU:

• Dewiswch bynciau rydych chi’n eu mwynhau ac rydych chi’n angerddol amdanynt. Bydd hyn yn gwneud astudio yn fwy pleserus ac yn llai o straen.
• Os ydych chi’n ystyried gyrfa benodol, ymchwiliwch i ba bynciau efallai y bydd eu hangen ar gyfer y maes hwnnw.
• Meddyliwch am y pynciau a fydd yn ddefnyddiol ar gyfer cymwysterau Safon Uwch, BTEC, neu gymwysterau ôl-16 eraill.
• Dewiswch gymysgedd o bynciau i gadw eich opsinau ar agor.
• Trafodwch eich opsiynau gyda’ch aelodau teulu, eich athrawon a’ch cynghorwyr gyrfa. Gallant roi cymorth a chefnogaeth wrth i chi ystyried eich dewisiadau.
• Ymchwiliwch i’r hyn y mae pob pwnc yn ei gynnwys. Gall deall gofynion y gwaith cwrs a gofynion yr arholiadau eich helpu i wneud penderfyniad gwybodus.
• Cofiwch, mae’n iawn i chi deimlo’n ansicr. Cymerwch eich amser wrth archwilio eich opsiynau a dewiswch bynciau sy’n alinio â’ch diddordebau a’ch dyheadau ar gyfer y dyfodol.

Pryd ddylwn i gyflwyno cais?

Rydym yn argymell eich bod yn cyflwyno cais cyn gynted â phosibl am fod llawer o’n cyrsiau’n llenwi’n gyflym. Caiff ceisiadau eu prosesu ar sail y cyntaf i’r felin felly mae cyflwyno cais yn gynnar yn rhoi’r siawns orau posibl i chi ennill lle.

Beth sy’n digwydd os ydw i’n methu fy arholiadau Saesneg a Mathemateg?

Fel dysgwr amser llawn yn y coleg, cewch gymorth i wella eich sgiliau Mathemateg a’ch sgiliau Saesneg. Os nad oeddech chi wedi llwyddo i ennill gradd C neu uwch ar gyfer eich arholiadau TGAU Mathemateg a Saesneg, byddwch chi’n parhau i astudio’r pynciau hyn gyda ni. Yn dibynnu ar eich lefel, bydd hyn naill ai’n golygu ailsefyll eich arholiadau TGAU neu weithio ar Sgiliau Hanfodol. Os ydych chi eisoes wedi ennill gradd C neu uwch, byddwch chi’n parhau i ddatblygu’r sgiliau hyn drwy gydol eich prif gwrs neu drwy gymhwyster Tystysgrif Her Sgiliau.

Mae’r rhan fwyaf o gyflogwyr a phrifysgolion yn chwilio am ymgeiswyr sy’n meddu ar gymhwyster TGAU mewn Mathemateg a Saesneg, graddau A* i C. Os nad ydych chi’n meddu ar y cymwysterau hyn, gall gyfyngu ar eich opsiynau ar gyfer swyddi ac astudio. Ond, peidiwch â phoeni, os nad oeddech chi wedi ennill y graddau angenrheidiol, gallwn ni roi ail gyfle i chi.

Pam dylech chi wella eich sgiliau Mathemateg a’ch sgiliau Saesneg?

• Rhoi hwb i’ch rhagolygon swydd
• Ehangu eich cyfleoedd gyrfa
• Potensial i ennill mwy o arian

A fyddaf yn cael unrhyw gymorth ariannol?

Mae llawer o ffyrdd y gallwch chi gael cymorth ar gyfer costau astudio ac mae llawer o grantiau gwahanol ar gael yn dibynnu ar eich amgylchiadau. Os ydych chi’n 16 i 18 oed ac rydych chi’n byw yng Nghymru, gallech chi fod yn gymwys i gael Lwfans Cynhaliaeth Addysg, a allai dalu £40 yr wythnos i chi, a delir pob dwy wythnos.

I gael cymorth neu gyngor, e-bostiwch Wasanaethau Dysgwyr ar un o’n campysau neu ffoniwch 01495 333777. Ewch i tudalen cymorth ariannol. i gael yr holl wybodaeth angenrheidiol ar gyfer cyflwyno cais am gymorth ariannol.

Oes angen i mi dalu am fy nghyrsiau?

Os ydych chi’n ystyried astudio ar gyrsiau Safon Uwch neu gyrsiau BTEC yn Coleg Gwent, dyma newyddion da: nid oes yn rhaid i chi dalu amdanyn nhw! Mae hyn yn golygu y gallwch chi ganolbwyntio ar ddewis y pynciau rydych chi’n dwlu arnynt a chynllunio eich dyfodol heb boeni am ffioedd dysgu.

Gall penderfynu ar yr hyn i’w wneud ar ôl gorffen yn yr ysgol fod yn beth mawr a gall gael effaith go iawn ar eich dyfodol. Trwy ddysgu am y gwahaniaethau rhwng cymwysterau Safon Uwch a chymwysterau BTEC, deall pam bod ennill cymwysterau Saesneg a Mathemateg mor bwysig a gwybod sut i gyflwyno cais, gallwch chi wneud dewisiadau clyfar sy’n cyd-fynd â’ch nodau. Mae’n hollol normal i chi deimlo’n ansicr felly peidiwch ag oedi i ofyn i’ch athrawon, eich cynghorwyr gyrfa neu ein tîm recriwtio myfyrwyr cyfeillgar yma yn y coleg. Trwy’r wybodaeth a’r gefnogaeth gywir, gallwch chi ddechrau eich pennod nesaf yn hyderus a sefydlu eich hun i brofi llwyddiant.