Hyfforddiant Gyrru Cerbydau Nwyddau Trwm / Cerbydau Nwyddau Mawr Categori 1 (hyd at 7.5 tunnell)

Yn gryno

Bydd y cwrs hwn yn eich galluogi chi i yrru cerbydau nwyddau mawr categori C1 hyd at bwysau gros o 7.5 tunnell. Gallai’r rhain fod yn gerbydau nwyddau bach neu ambiwlansys yn y gwasanaethau brys.

Ar ôl cwblhau’r cwrs, gallech chi benderfynu uwchraddio eich trwydded i drwydded cerbydau nwyddau trwm C (Dosbarth 2) neu drwydded categori CE (Dosbarth 1).

Mae’r cwrs hwn ar gael fel rhan o Gyfrif Dysgu Personol. Mae Cyfrif Dysgu Personol yn fenter gan Lywodraeth Cymru sy’n cynnig cyfle i bobl gyrchu cyrsiau rhan-amser, am ddim, sy’n cynnig dysgu hyblyg a chyfleus sy’n cyd-fynd â’u ffordd o fyw bresennol (yn amodol ar gymhwysedd).

Mae'r cwrs hwn ar gyfer...

Unigolion sydd ar hyn o bryd o dan gyflogaeth Tata Steel UK (safleoedd yng Nghymru) NEU eu cadwyn gyflenwi Gymreig ehangach (gan gynnwys mewn perygl o ddiswyddiad), 19+ mlwydd oed, yn byw yng Nghymru.

Cynnwys y cwrs

Fel arfer, caiff hyfforddiant gyrru ymarferol ei gynnal ar sail un i un dros ddiwrnod a hanner gan gynnwys eich prawf ymarferol. Yn ystod yr amser hwn, byddwch chi’n dysgu sut i wirio am ddiffygion, gyrru a symud cerbyd Categori C1 i’r safon ofynnol.

Mae’r prawf ymarferol yn cynnwys dwy ran:

• ymarferiad bacio ‘siâp S’ i mewn i fan llwytho
• gyrru ar y ffordd am 60 munud

Byddwch chi’n dychwelyd ar gyfer diwrnod ychwanegol i gwblhau eich cymhwyster Tystysgrif Gallu Proffesiynol i Yrwyr, Modiwl 4. Bydd angen y cymhwyster hwn arnoch chi i ddefnyddio eich trwydded C1 at ddibenion gwaith.

Gofynion Mynediad

Cyn yr hyfforddiant ymarferol, bydd angen i chi:

• gwblhau asesiad meddygol er mwyn cyflwyno cais am eich trwydded yrru dros dro
• pasio’r profion theori Cerbydau Nwyddau Mawr perthnasol

Caiff yr elfennau hyn eu trefnu ar eich cyfer chi.