EAL Diploma NVQ Peirianneg (Saernïo a Weldio) Lefel 2

Yn gryno

Os ydych yn gweithio neu'n dymuno gweithio yn y maes peirianneg neu weithgynhyrchu, mae'r cwrs hwn yn ffordd wych o wella'ch gwybodaeth a'ch sgiliau gwneuthuriad a weldio, gan fynd i'r afael ag ystod o fanylebau weldio a gydnabyddir gan y diwydiant.

Mae'r cwrs hwn ar gyfer...

... Unrhyw un sydd eisiau dysgu weldio i fanylebau a safonau a gydnabyddir gan y diwydiant peirianneg.

Cynnwys y cwrs

Mae'r cwrs yn ymdrin â'r prosesau weldio Metal Active/Inert Gas Shielding (MAGS/MIGS), Manual Metal Arc (MMA), Tungsten Active/Inert Gas Shielding (TAGS/TIGS) ac Oxy-Fuel Burning, a bydd angen i chi gwblhau ystod o uniadau wedi'u weldio mewn safleoedd weldio amrywiol i'r safon weldio BSEN 4872.

Bydd angen i chi gydnabod ac adnabod diffygion weldio sylfaenol, gan ddangos sut i adfer ac atal unrhyw namau a all godi, ac addasu a phennu'r amodau ar gyfer weldio yn unol â manylebau perthnasol a gweithdrefnau weldio.

Bydd angen i chi hefyd baratoi ar gyfer weldio drwy gael gafael ar y cyfarwyddiadau angenrheidiol i'r swydd, deunyddiau, offer, cyfarpar ac unrhyw ddogfennaeth, a gwirio ac archwilio'r cyfarpar weldio i wneud yn siwr ei fod mewn cyflwr gweithio diogel ac yn addas ar gyfer ymgymryd â gwaith weldio.

Erbyn diwedd y cwrs, bydd gennych y wybodaeth a'r ddealltwriaeth i gymhwyso technegau a gweithdrefnau weldio yn ddiogel, deall y gwahanol brosesau weldio a'u cymhwysiadau yn ogystal â'r offer, deunyddiau a'r offer treuliadwy a ddefnyddir - ac wedi hynny gallwch symud ymlaen i gymhwyster Uwch Weldio Lefel 3 City & Guilds.

Gofynion Mynediad

Bydd angen i chi feddu ar gymhwyster Lefel 1 mewn Saernïo a Weldio, Dyfarniad Lefel 2 City & Guilds mewn Weldio Uwch, ac o leiaf 2 flynedd o brofiad yn y diwydiant o'r prosesau weldio dethol neu gyfweliad i asesu eich sgiliau.

Gwybodaeth Ychwanegol

Bydd angen i chi ddarparu eich Cyfarpar Diogelu Personol eich hun (esgidiau dur trwm ac oferôls o ddeunydd gwrthdan).